കൊടുവള്ളി: നീണ്ട 36 വർഷത്തെ കലാലയ ഓർമ്മകൾ പങ്കുവെക്കാനും സൗഹൃദം പുതുക്കാനുമായി കെ.എം.ഒ കോളേജ് 1990, 1991 ബാച്ച് പൂർവ്വ വിദ്യാർത്ഥികൾ വീണ്ടും ഒത്തുചേർന്നു.
കൊടുവള്ളി കിഴക്കോത്ത് അൽഫിത്ര ഓഡിറ്റോറിയത്തിൽ 'സ്നേഹ സൗഹൃദ സംഗമം' എന്ന പേരിൽ ആവേശോജ്ജ്വലമായ ഒത്തുചേരൽ സംഘടിപ്പിച്ചത്.
മൂന്നര പതിറ്റാണ്ടുകൾക്ക് മുൻപ് ഒരേ ക്യാമ്പസിൽ ഒന്നിച്ച് പഠിച്ചിറങ്ങിയ കൂട്ടുകാരുടെ ഈ ഒത്തുചേരൽ, ഇന്നും കെടാതെ സൂക്ഷിക്കുന്ന ഉറ്റ സൗഹൃദത്തിന്റെ നേർക്കാഴ്ചയായി മാറി.
ഈ കൂട്ടായ്മയിൽ നിന്നും അകാലത്തിൽ മൺമറഞ്ഞുപോയ പ്രിയ സുഹൃത്തുക്കളെ അനുസ്മരിച്ചുകൊണ്ട് ഒരു മിനിറ്റ് നീണ്ടുനിന്ന പ്രാർത്ഥനയോടെയാണ് ചടങ്ങുകൾക്ക് തുടക്കമായത്.
കൂട്ടായ്മ സെക്രട്ടറി ഖാലിദ് കാത്തർമ്മൽ ചടങ്ങിൽ സ്വാഗതം ആശംസിച്ചു. സലീം താമരശ്ശേരി അധ്യക്ഷത വഹിച്ച ചടങ്ങിന്റെ ഔപചാരികമായ ഉദ്ഘാടനം ഷാജില നിർവ്വഹിച്ചു.
ബാബുമോൻ, ഖാദർ K.K, നാസർകോയ തങ്ങൾ എന്നിവരെ ജനപ്രതിനിധികളായി തെരഞ്ഞെടുക്കപ്പെട്ടതിലുള്ള സ്നേഹാദരവ് കൈമാറി.
കേരള സ്റ്റേറ്റ് ഓഡിറ്റ് ഓഫീസിൽ ഗസറ്റഡ് ഓഫീസറായി സ്ഥാനക്കയറ്റം ലഭിച്ച ഷൈന ശ്രീനിവാസൻ, സബ് ഇൻസ്പെക്ടർ ഓഫ് പോലീസ് (SI) ആയി പ്രൊമോഷൻ നേടിയ മുജീബ് എളേറ്റിൽ, മുനീർ ആരാമ്പ്രം എന്നിവരെയും ആദരിച്ചു.
കൂട്ടായ്മയിലെ അംഗങ്ങളുടെ മക്കളിൽ 2025-2026 അധ്യയന വർഷത്തെ SSLC, Plus Two, VHSE പരീക്ഷകളിൽ ഉന്നത വിജയം കരസ്ഥമാക്കിയ കുട്ടികളെയും, മറ്റ് ഉന്നത വിദ്യാഭ്യാസ മേഖലകളിൽ മികവ് തെളിയിച്ച പ്രതിഭകളെയും ചടങ്ങിൽ അനുമോദിച്ചു.
ജീവിതയാത്രയ്ക്കിടയിൽ എവിടെയോ വെച്ച് നഷ്ടപ്പെട്ടുപോയ പ്ലസ് ടു വിദ്യാഭ്യാസം കഠിനാധ്വാനത്തിലൂടെയും നിശ്ചയദാർഢ്യത്തിലൂടെയും തിരിച്ചുപിടിച്ച പ്രിയ സഹപാഠി മജീദിന് വേദിയിൽ നൽകിയ പ്രത്യേക ആദരവ് ഏറെ ഹൃദ്യമായി.
'ദി സെക്കൻഡ് ഇന്നിങ്സ് ഓഫ് ലൈഫ്'
സംഗമത്തിന്റെ ഭാഗമായി പ്രശസ്ത കൗൺസിലർ ജസ്ന A.K നയിച്ച വിജ്ഞാനപ്രദമായ ക്ലാസ്സ് ശ്രദ്ധേയമായി. "The second innings of life - ജീവിക്കാം മനോഹരമായിട്ട്" എന്ന വിഷയത്തെ ആസ്പദമാക്കി, ജീവിതത്തിന്റെ രണ്ടാം പകുതി എങ്ങനെ കൂടുതൽ സന്തോഷകരവും അർത്ഥവത്തുമാക്കാം എന്ന് അവർ വിശദീകരിച്ചു.
ചടങ്ങിൽ സഹപാഠികളായ ഖാദർ K.K, ബാബുമോൻ, നാസർകോയ തങ്ങൾ, ഷെറീന, ഹാരിസ് T.V, മുഈനുദ്ധീൻ, സുലൈഖ, റഷീദ് പൂച്ചേരി, റാമിസ്, അർഷാദ്, മുനീർ, വിനോദ് എന്നിവർ ആശംസകൾ നേർന്നു സംസാരിച്ചു.
പഴയകാല ക്യാമ്പസ് ഓർമ്മകളും പാട്ടുകളും വിശേഷം പങ്കുവെക്കലുകളുമായി ഏറെ വൈകിയാണ് സംഗമം അവസാനിച്ചത്.
ചടങ്ങിന് അഷ്റഫ് പുത്തൂർ നന്ദി രേഖപ്പെടുത്തി.
വാർത്താ ഗ്രൂപ്പിൽ അംഗമാവാൻ താഴെ കാണുന്ന ലിങ്കിൽ അമർത്തുക.
https://chat.whatsapp.com/EpDA0K2P0Qk7uxWxXzPRSM?s=cl&p=a&ilr=1&amv=3