ഞായറാഴ്ച രാവിലെയാണ് കുറ്ററ സ്വദേശിയായ ആശിഖ് പിതാവ് അനിൽ കുമാറിനൊപ്പം പനിക്ക് ചികിത്സ തേടി എത്തിയത്. ചുമയ്ക്കുള്ള മരുന്നിന് കുപ്പി വേണമെന്ന് ഫാർമസിയിൽ നിന്ന് പറഞ്ഞപ്പോൾ അനിൽകുമാർ പുറത്തുനിന്ന് കുപ്പി കൊണ്ടുവന്ന് മരുന്നുവാങ്ങി.
പിന്നീട് വീട്ടിലെത്തി മരുന്ന് കഴിച്ചപ്പോഴാണ് ശാരീരിക അസ്വസ്ഥതയുണ്ടായത്. ഉടൻ തന്നെ സാമൂഹികആരോഗ്യ കേന്ദ്രത്തിലെത്തി ഡോക്ടറെ വിവരം അറിയിച്ചു. ചുമയുടെ മരുന്നായി തറ തുടയ്ക്കുന്ന ലോഷനാണ് ആശുപത്രിയിൽ നിന്ന് ലഭിച്ചതെന്നാണ് കുട്ടിയുടെ കുടുംബം ആരോപിക്കുന്നത്.
മരുന്ന് കഴിച്ചപ്പോൾ വയറ്റിൽ നീറ്റലുണ്ടായെന്നാണ് പറയുന്നത്. സംഭവത്തിൽ ഡിഎംഒയ്ക്ക് ആശുപത്രി മെഡിക്കൽ ഓഫീസർ റിപ്പോര്ട്ട് സമര്പ്പിച്ചു. കുട്ടിയുടെ അച്ഛൻ നൽകിയ പരാതിയിൽ പുത്തൂര് പൊലീസ് അന്വേഷണം തുടങ്ങി. ആശുപത്രി ജീവനക്കാർക്കെതിരെ അന്വേഷണം വേണമെന്നാണ് ആവശ്യം.