രാവിലെ 11.30ന് ആരംഭിച്ച ചോദ്യംചെയ്യല് വൈകിട്ട് ആറര മണിയോടെയാണ് പൂര്ത്തിയായത്. ആലുവ പൊലീസ് ക്ലബില് വച്ചാണ് ചോദ്യംചെയ്യല് നടന്നത്. ചോദ്യംചെയ്യല് നടപടികള് പൂര്ണമായും ചിത്രീകരിച്ചിട്ടുണ്ട്.
നാളെയും ചോദ്യംചെയ്യലിന് ഹാജരാകണമെന്ന് ദിലീപിനോട് അന്വേഷണസംഘം നിര്ദേശിച്ചിട്ടുണ്ട്.
കേസിലെ സാക്ഷികളെ സ്വാധീനിക്കാന് ശ്രമിച്ചിട്ടില്ലെന്നും ബാലചന്ദ്രകുമാറിന്റെ മൊഴിയെ കുറിച്ച് തനിക്ക് അറിയില്ലെന്നുമാണ് ഇന്നത്തെ ചോദ്യം ചെയ്യലില് ദിലീപ് പറഞ്ഞത്. നടിയെ അക്രമിച്ച ദൃശ്യങ്ങള് താന് കണ്ടിട്ടില്ലെന്ന് ദിലീപ് വാദിച്ചു
ചോദ്യംചെയ്യലിന് ശേഷം എഡിജിപി ശ്രീജിത്തിന്റെ നേതൃത്വത്തില് അന്വേഷണസംഘം യോഗം ചേരുകയാണ്. ചോദ്യംചെയ്യല് വീഡിയോയും ഉദ്യോഗസ്ഥര് പരിശോധിക്കുന്നുണ്ട്. നിര്ണായകമായ നീക്കം തന്നെയാണ് ഉദ്യോഗസ്ഥര് നടത്തുന്നതെന്നാണ് വിവരങ്ങള്.
പല ചോദ്യങ്ങള്ക്കും ഉത്തരമില്ലാതിരുന്ന ദിലീപ് കരഞ്ഞുകൊണ്ടാണ് പ്രതികരിച്ചതെന്നാണ് അന്വേഷണസംഘം നല്കുന്ന വിവരം. സംവിധായകന് ബാലചന്ദ്രകുമാര് നടത്തിയ വെളിപ്പെടുത്തലുകളും കൈമാറിയ വീഡിയോ തെളിവുകളും ഉള്പ്പെടുത്തി വിശദമായ ചോദ്യാവലിയാണ് ക്രൈംബ്രാഞ്ച് തയ്യാറാക്കിയത്.നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ വധിക്കാന് ഗൂഢാലോചന നടത്തിയ കേസില് അന്വേഷണം തുടരുന്നതിനിടെയാണ് നടിയെ ആക്രമിച്ച കേസില് ദിലീപിനെ വീണ്ടും ചോദ്യം ചെയ്തത്.
എസ് പി സോജന്റെയും ഡിവൈഎസ്പി ബൈജു പൗലോസിന്റെയും നേതൃത്വത്തിലാണ് ചോദ്യം ചെയ്യല് നടന്നത്.
ദിലീപിന്റെ ഫോണിലെ ഫൊറന്സിക് പരിശോധനയില് നിന്നും നിര്ണായകമായ വിവരങ്ങളാണ് അന്വേഷണ സംഘത്തിന് ലഭ്യമായിരിക്കുന്നത്. പകര്പ്പെടുക്കാന് പോലും അനുവാദമില്ലാത്ത സുപ്രധാന കോടതി രേഖകളും ദിലീപിന്റെ കൈയ്യിലുണ്ടായിരുന്നെന്ന വിവരം റിപ്പോര്ട്ടര് ടിവി നേരത്തെ പുറത്തുവിട്ടിരുന്നു. കേസുമായി ബന്ധപ്പെട്ട അതീവ രഹസ്യരേഖകള് കേസില് പ്രതിയായ ദിലീപിന്റെ മൊബൈലിലെത്തിയത് ഫോറന്സിക് വിദഗ്ധര് ശാസ്ത്രീയ പരിശോധനയിലൂടെ സ്ഥിരീകരിച്ചു.
വാട്സാപ്പ് വഴിയാണ് ദിലീപിന് രേഖകള് ലഭിച്ചതെന്നും റിപ്പോര്ട്ടില് വ്യക്തമാണ്. ദിലീപിന്റെ ഫോണില് നിന്നും മാറ്റപ്പെട്ട കോടതി രേഖകള് ഫോറന്സിക് സംഘം വീണ്ടെടുത്തു. കേസില് എട്ടാം പ്രതിയായ ദിലീപിന്റെ ഫോണിലേക്ക് കോടതിയില് നിന്നും രഹസ്യ രേഖകള് എത്തിയെന്ന വിവരം പൊലീസ് തന്നെ സ്ഥിരീകരിച്ചത് വന് വഴിത്തിരിവുകള്ക്ക് ഇടയാക്കിയേക്കും.
Tags:
Latest News