തിരുവനന്തപുരം: സംസ്ഥാനത്ത് ബസ് ചാര്ജിനൊപ്പം ഓട്ടോ, ടാക്സി നിരക്കുകൾ കൂടുമെന്നുറപ്പായി. ഓട്ടോ മിനിമം ചാര്ജ് 25 ല് നിന്ന് 30 ആകും. ചാര്ജ് വര്ദ്ധന സംബന്ധിച്ച് അന്തിമ തീരുമാനം സര്ക്കാര് എടുക്കുമെന്ന് ജസ്റ്റിസ് രാമചന്ദ്രന് കമ്മിറ്റിയുമായി നടത്തിയ ചര്ച്ചയ്ക്ക് ശേഷം ഗതാഗതമന്ത്രി ആന്റണി രാജു പറഞ്ഞു.ഓട്ടാ ടാക്സി നിരക്ക് വര്ദ്ധിപ്പിക്കുന്നതുമായി ബന്ധപ്പെട്ട് ഗതാഗത മന്ത്രി ആന്റണി രാജു ജസ്റ്റിസ് രാമചന്ദ്രന് കമ്മിറ്റിയുമായി ചര്ച്ച ചെയ്ത ശേഷമാണ് മാധ്യമങ്ങളെ കണ്ടത്. അവസാനം ഓട്ടോ ടാക്സി ചാര്ജ് കൂട്ടിയത് നാല് കൊല്ലം മുമ്പാണെന്നും അതിന് ശേഷം പെട്രോള്, ഡീസല് വിലയില് വലിയ വര്ദ്ധനയുണ്ടായതായും മന്ത്രി പറഞ്ഞു.
നിലവില് 25 രൂപ മിനിമം ചാര്ജുള്ള ഓട്ടോ ചാര്ജ് 30 ആക്കണമെന്നാണ് ജസ്റ്റിസ് രാമചന്ദ്രന് കമ്മിറ്റിയുടെ നിര്ദേശം. തുടര്ന്നുള്ള ഓരോ കിലോമീറ്ററിനും 15 രൂപയാക്കണമെന്നും കമ്മിറ്റി നിര്ദേശിക്കുന്നു. ടാക്സി നിരക്ക് 210 ഉം 240 ഉം മിനിമം ചാര്ജ് ആക്കണമെന്നും ജസ്റ്റിസ് രാമചന്ദ്രന് കമ്മിറ്റി ശുപാര്ശ ചെയ്തു. ശുപാര്ശയുടെ അടിസ്ഥാനത്തില് സര്ക്കാര് ചാര്ജ് വര്ദ്ധനയില് അന്തിമ തീരുമാനമെടുക്കും. സര്ക്കാര് തീരുമാനം ഉടനുണ്ടാകുമോ എന്ന ചോദ്യത്തോട് ഈ മാസം മുപ്പതാം തീയതി എല്ഡിഎഫ് യോഗമുണ്ട് എന്നായിരുന്നു മന്ത്രിയുടെ മറുപടി.
