എ. ആര്. നഗര് സഹകരണ ബാങ്കിനെ മറയാക്കി 300 കോടിയുടെ കള്ളപ്പണം വെളുപ്പിച്ചെന്ന് പി.കെ കുഞ്ഞാലിക്കുട്ടിക്കെതിരെ കെ.ടി ജലീല് ആരോപണം ഉന്നയിച്ചിരുന്നു. ഇടപാടുകാരറിയാതെ കോടികളുടെ നിക്ഷേപം ബാങ്കില് വന്നതിന്റെ രേഖകളും പുറത്തുവിട്ടിരുന്നു. കള്ളപ്പണ ഇടപാട് ഇ.ഡി അന്വേഷിക്കണമെന്ന് കെ.ടി ജലീല് ആവശ്യപ്പെട്ടിരുന്നു. എന്നാല് മുഖ്യമന്ത്രി പിണറായി വിജയനും സി.പി.എം നേതൃത്വവും പിന്തുണച്ചില്ല
ആരോപണങ്ങളുമായി കെ.ടി ജലീല് മുന്നോട്ട് പോകുന്നത് രാഷ്ട്രീയ പ്രതിസന്ധിയാകുമെന്ന ആശങ്കയിലാണ് പി.കെ കുഞ്ഞാലിക്കുട്ടി. അനുനയിപ്പിക്കാന് നേരത്തെയും ശ്രമിച്ചിരുന്നുവെങ്കിലും കെ.ടി ജലീല് വഴങ്ങിയിരുന്നില്ല. ഇരുവരുടെയും സുഹൃത്തുക്കളായ വ്യവസായികളുടെ ശ്രമത്തിനൊടുവിലാണ് കെ.ടി ജലീല് പി.കെ കുഞ്ഞാലിക്കുട്ടിയെ കാണാന് സമ്മതിച്ചത്.
സ്വന്തം കാറിലായിരുന്നില്ല പി.കെ കുഞ്ഞാലിക്കുട്ടി വ്യവസായിയുടെ വീട്ടിലെത്തിയത്. കെ.ടി ജലീല് നേരത്തെ തന്നെ വീട്ടിലെത്തിയിരുന്നു. അടച്ചിട്ട മുറിയിലായിരുന്നു ചര്ച്ച. മുസ്ലിം ലീഗില് നിന്നും കെ.ടി ജലീലിനെ പുറത്താക്കിയതില് തനിക്ക് പങ്കില്ലെന്ന് പി.കെ കുഞ്ഞാലിക്കുട്ടി മധ്യസ്ഥ ചര്ച്ചയ്ക്കിടെ തന്നെ വ്യക്തമാക്കി. വ്യക്തി വിരോധവുമില്ല. ആരോപണങ്ങളുമായി ജലീല് മുന്നോട്ട് പോകുന്നത് പ്രതിസന്ധിയിലാക്കുമെന്നും പി.കെ കുഞ്ഞാലിക്കുട്ടി തുറന്ന് പറഞ്ഞു
ഇതു സംബന്ധിച്ച് വിവരങ്ങൾ ആരാഞ്ഞ മാധ്യമ പ്രവർത്തകരോട് പുറത്തു വന്ന വാർത്ത കുഞ്ഞാലിക്കുട്ടി നിഷേധിച്ചില്ല.
Tags:
Latest News