'കർത്തയുടെ നിയമന വിഷയം ‌വാക്കാൽ പറയാതെ കത്തെഴുതി അപമാനിച്ചു'; ജ്യോതിലാലിനെ മാറ്റാതെ ഒപ്പിട്ടില്ല

നയപ്രഖ്യാപനത്തിൽ ​ഗവർണർ ആരിഫ് മു​ഹമ്മദ് ഖാൻ ഒപ്പിടാൻ വിസമ്മതിച്ചതിന് പിന്നിൽ ബി.ജെ.പി. സംസ്ഥാന കമ്മിറ്റി അംഗം ഹരി എസ്. കർത്തയെ ഗവർണറുടെ പേഴ്സണൽ സ്റ്റാഫിൽ നിയമിച്ചതുമായി ബന്ധപ്പെട്ട വിവാ​ദം. കർത്തയുടെ നിയമനവുമായി ബന്ധപ്പെട്ട് വാക്കാൽ പറഞ്ഞാൽ മതിയായിരുന്ന വിയോജനങ്ങൾ കത്തായി പുറത്തുവിട്ടത് ​ഗവർണറെ ചൊടിപ്പിച്ചു. കത്തിൽ പറ‍ഞ്ഞ വിവരങ്ങൾ മാധ്യമങ്ങളിൽ വാർ‍ത്താ പ്രാധാന്യം നേടിയതോടെ ​സർക്കാർ തന്നെ അപമാനിച്ചുവെന്ന നിലപാടിലേക്ക് ​ഗവർണർ എത്തിച്ചേർന്നു.

ഇതോടെയാണ് രണ്ടാം പിണറായി സർക്കാരിന്റെ രണ്ടാം നയപ്രഖ്യാപന പ്രസം​ഗത്തിൽ ഒപ്പിടില്ലെന്ന് വാശിയിലേക്ക് കാര്യങ്ങളെത്തിച്ചത്. കർത്തയുടെ നിയമനത്തിൽ ഫയൽ എഴുതിയ പൊതുഭരണ സെക്രട്ടറി കെ ആർ ജ്യോതി ലാലിനെ മാറ്റണമെന്ന് നിലപാടിൽ ഉറച്ചുനിന്നു. നിയമസഭാ സമ്മേളനം ആരംഭിക്കാൻ മണിക്കൂറുകൾ മാത്രം ബാക്കിയുള്ളപ്പോൾ രൂപപ്പെട്ടിരിക്കുന്ന പ്രതിസന്ധി മറികടക്കാൻ പിണറായി നേരിട്ടെത്തിയെങ്കിലും ആരിഫ് മു​ഹമ്മദ് ഖാൻ വഴങ്ങിയില്ല. കഴിഞ്ഞ ദിവസം സമാന ശ്രമങ്ങളുമായി സ്പീക്കർ എംബി രാജേഷും ​ഗവർണറെ കണ്ടിരുന്നു.

എന്നാൽ കെആർ ജ്യോതിലാലിനെ മാറ്റാതെ പിന്മാറില്ലെന്ന് ​ഗവർണറുടെ വാശി അം​ഗീകരിക്കുകയല്ലാതെ സർക്കാരിന് മുന്നിൽ മറ്റു മാർ​ഗങ്ങളില്ലാതായി. നയ പ്രഖ്യാപനം വായിക്കാതെ ​ഗവർണർ വാശി തുടർന്നാൽ ഭരണഘടനാ പ്രതിസന്ധി രൂപപ്പെടും ഇതൊഴിവാക്കാനാണ് സർക്കാർ രാജ്ഭവനുമായി അനുനയത്തിലേക്ക് എത്തിച്ചേർന്നത്. ​മന്ത്രിമാരുടെ പേഴ്സണൽ സ്റ്റാഫിന് പെൻഷൻ നൽകാനുള്ള തീരുമാനത്തിനെതിരെയും ​ഗവർണർ നിലപാടെടുത്തിരുന്നു. എന്നാൽ ഇക്കാര്യത്തിൽ പിന്നോട്ടുപോയി.

​ഗവർണർ അനുനയത്തിലേക്ക് എത്തില്ലെന്ന് വ്യക്തമായതോടെ കെആർ ജ്യോതിലാലിനെ പൊതുഭരണ സെക്രട്ടറി സ്ഥാനത്ത് നിന്ന് നീക്കി സർക്കാർ ഉത്തരവിറക്കി. ജ്യോതിലാലിന് പകരം ശാരദാ മുരളീധരന് താൽക്കാലിക ചുമതല നൽകിയതോടെ നയപ്രഖ്യാപന പ്രസം​ഗത്തിൽ ഒപ്പിട്ട ​ഗവർണർ പ്രശ്നങ്ങൾ അവസാനിപ്പിച്ചു.