500 കോടിയുടെ രണ്ട് ലക്ഷം കിലോ കഞ്ചാവ് കൂട്ടിയിട്ട് കത്തിച്ച് ആന്ധ്രാ പോലീസ്

വിശാഖപട്ടണം ജില്ലയിലെ അനകപ്പള്ളിക്ക് സമീപമുള്ള കൊഡരു ജില്ലയിൽ പ്രത്യേകം തയ്യാറാക്കിയ സ്ഥലത്തു വെച്ചാണ് കഞ്ചാവ് കൂട്ടിയിട്ട് കത്തിച്ചത്. കഴിഞ്ഞ രണ്ട് വർഷത്തിനിടെ വടക്കൻ ആന്ധ്രാ പ്രദേശിൽ നിന്നു മാത്രം പിടികൂടിയ കഞ്ചാവാണ് നശിപ്പിച്ചത്

അമരാവതി: പലപ്പോഴായി പിടിച്ചെടുത്ത രണ്ട് ലക്ഷം കിലോ കഞ്ചാവ് നശിപ്പിച്ചതായി ആന്ധ്രാ പോലീസ്. രണ്ട് വർഷത്തിനിടെ വടക്കൻ ആന്ധ്രാ പ്രദേശിൽ നിന്നു മാത്രം പിടിച്ചെടുത്ത കഞ്ചാവാണ് ആന്ധ്രാ പോലീസിന്റെ ഓപ്പറേഷൻ പരിവർത്തനയുടെ ഭാഗമായി തീയിട്ട് നശിപ്പിച്ചത്. 500 കോടി രൂപ വിലമതിക്കുന്ന കഞ്ചാവാണ് തീയിട്ട് നശിപ്പിച്ചതെന്ന് പോലീസ് വ്യക്തമാക്കി

വിശാഖപട്ടണം ജില്ലയിലെ അനകപ്പള്ളിക്ക് സമീപമുള്ള കൊഡരു ജില്ലയിൽ പ്രത്യേകം തയ്യാറാക്കിയ സ്ഥലത്തു വെച്ചാണ് കഞ്ചാവ് കൂട്ടിയിട്ട് കത്തിച്ചത്. ആന്ധ്ര പോലീസ് മേധാവി ഡി ഗൗതം സവാങും മുതി‍ര്‍ന്ന പോലീസ് ഉദ്യോഗസ്ഥരും സ്ഥലത്ത് എത്തിയിരുന്നു. ഓപ്പറേഷൻ പരിവ‍ര്‍ത്തനയുടെ ഭാഗമായി ഏക്കര്‍ കണക്കിന് കഞ്ചാവ് തോട്ടങ്ങൾ നേരത്തെ പോലീസ് നശിപ്പിച്ചിരുന്നു

ഇതൊരു ചരിത്ര സംഭവമാണെന്ന് ആന്ധ്രാ പോലീസ് ട്വീറ്റ് ചെയ്തു. വിശാഖപട്ടണത്തെ സ്പെഷ്യൽ എൻഫോഴ്സ്മെന്റ് ബ്യൂറോ, ഡ്രഗ് ഡിസ്പോസിബിൾ കമ്മിറ്റി, ആന്ധ്രാ പോലീസ് എന്നിവരുടെ നേതൃത്വത്തിലാണ് കഞ്ചാവ് നശിപ്പിച്ചതെന്ന് പോലീസ് വ്യക്തമാക്കി.

ഓപ്പറേഷന്റെ ഭാഗമായി സംസ്ഥാനത്ത് ആകെ 1,363 കേസുകൾ രജിസ്റ്റ‍ര്‍ ചെയ്തിട്ടുണ്ട്. 1500 പേരെ അറസ്റ്റ് ചെയ്തു. ഇതിൽ 562 പേ‍ര്‍ മറ്റ് സംസ്ഥാനങ്ങളിൽ നിന്നുള്ളവരാണെന്ന് പോലീസ് പറഞ്ഞു.