ആലപ്പുഴ നഗരമധ്യത്തില്‍ ഭീമന്‍ ഉടുമ്പ്: തടിച്ചുകൂടി നാട്ടുകാര്‍

ആലപ്പുഴ:നഗരമധ്യത്തില്‍ ഭീമന്‍ ഉടുമ്പിനെ കണ്ടെത്തിയത് നാട്ടുകാരില്‍ ഭയവും കൗതുകവുമുണര്‍ത്തി. ആശ്രമം വാര്‍ഡില്‍ സെന്റ് മേരീസ് സ്‌കൂളിന് വടക്ക് മേത്തരുപറമ്പില്‍ അനില്‍കുമാറിന്റെ പുരയിടത്തില്‍ വെള്ളിയാഴ്ച പകല്‍ 3.30ഓടെയാണ് ഉടുമ്പിനെ കണ്ടത്.

മണിക്കൂറുകളോളം പരിഭ്രാന്തി സൃഷ്ടിച്ച ഉടുമ്പ് പിന്നീട് മറ്റ് പറമ്പുകളിലുമെത്തി ഇടത്തോട്ടിലൂടെ കടന്നുപോയെന്നാണ് വിവരം. നിരവധി പേര്‍ പരിസരത്ത് തടിച്ചുകൂടി. ചിലര്‍ വീഡിയോയും ചിത്രങ്ങളുമെടുത്തു.

വരാണസ് ബംഗാലെന്‍സിസ് എന്നാണ് ഈ ഉടുമ്പിന്റെ ശാസ്ത്രീയ നാമം. നാട്ടിലെ പന്നിയെലികളെ തിന്നു നശിപ്പിക്കുന്നതില്‍ ഈ ഇനം ഉടുമ്പ് വലിയ പങ്കുവഹിക്കുന്നുവെന്ന് പരിസ്ഥിതി പ്രവര്‍ത്തകനായ ഓര്‍ത്തോപീഡിക് സര്‍ജന്‍ ഡോ. ബി ശ്രീകുമാര്‍ പറഞ്ഞു. 61 മുതല്‍ 175 സെന്റീമീറ്റര്‍ വരെ നീളവും ഏഴരക്കിലോ വരെ തൂക്കവും ഈ ഇനത്തിനുണ്ട്- അദ്ദേഹം പറഞ്ഞു