നഴ്‌സിങ് വിദ്യാര്‍ഥിനിയെ കഴുത്ത് ഞെരിച്ച് കൊലപ്പെടുത്തിയ ശേഷം വിഷം കഴിച്ച യുവാവും മരിച്ചു

മൈസൂരു: നഴ്സിങ് വിദ്യാർഥിനിയെ കൊലപ്പെടുത്തിയശേഷം വിഷം കഴിച്ചതിനെത്തുടർന്ന് ചികിത്സയിലായിരുന്ന യുവാവ് മരിച്ചു. ശിവമൊഗ ജില്ലയിലെ ഹൊസനഗർ താലൂക്കിലെ ഹൊസകെരെയിലാണ് സംഭവം.

തലാലെ ഗ്രാമനിവാസി ശിവമൂർത്തി (21)യാണ് വെള്ളിയാഴ്ച ശിവമൊഗ ജില്ലാ ആശുപത്രിയിൽ മരിച്ചത്. കഴിഞ്ഞ ആറ് വർഷമായി 21-കാരിയായ നഴ്സിങ് വിദ്യാർഥിനിയുമായി ഇയാൾ പരിചയത്തിലായിരുന്നു.

ബുധനാഴ്ച ശിവമൂർത്തി യുവതിയെ ഹൊസകെരെയിലേക്ക് ബലമായി കൊണ്ടുവന്ന് കഴുത്തുഞെരിച്ച് കൊല്ലുകയായിരുന്നെന്ന് പോലീസ് പറഞ്ഞു. കൃത്യം നടത്തിയശേഷം ഇയാൾ വിഷം കഴിക്കുകയായിരുന്നു. മറ്റൊരു യുവാവുമായി യുവതിക്കുള്ള അടുപ്പത്തിൽ തനിക്ക് അതൃപ്തിയുണ്ടെന്ന കുറിപ്പ് ഇയാളുടെ പക്കൽനിന്ന് കണ്ടെടുത്തു.